Бүгүн, 2023-жылдын 12-декабрында, “Жылдын мыкты китеби” сынагынын жеңүүчүлөрүнө Ардак грамоталар жана акчалай сыйлыктар тапшырылды. Иш-чара Адабият күнүнө жана Чыңгыз Айтматовдун 95 жылдык мааракесине карата уюштурулган. “Жылдын мыкты китеби” сынагы 2023-жылдын 10-июлунан 5-сентябрына чейин созулуп, соңку эки жылда жарык көргөн 350гө жакын китептин ичинен Жобого ылайык деп табылган: проза багыты – 23 китеп, поэзия – 24, балдар адабияты боюнча – 6 китеп Калыстар тобунун кароосуна сунушталган.

Калыстар тобунун баалоосу жана сунуш-пикирлеринин негизинде төмөнкүлөр жеңүүчү деп табылды:

– “Жылдын мыкты жазуучусу” номинациясы боюнча Калканбай Ашымбаев;

–“Жылдын мыкты прозасы” номинациясы боюнча Бейшенбай Усубалиевдин “Зоока” китеби;

–“Жылдын мыкты поэзиясы” номинациясы боюнча Бердибек Жамгырчиевдин “Романтика” китеби;

–“Жылдын мыкты балдар адабияты” номинациясы боюнча Байтемир Асаналиевдин “Балдан ширин балалык” китеби;

– “Жылдын мыкты басмасы” номинациясы боюнча “Кут-Бер” басмасы;

–Ал эми баш байге, “Жылдын мыкты китеби” номинациясы Элмирбек Иманалиевдин “Аманат” китебине ыйгарылды.